"Umangeska"

 ‘Umangeska man met.’ PM kaniak ti maysa a gayyem kalpasan ti maysa a Zoom Meeting kadaytoy laeng a rabii. Nabayagen nga am-ammok ken kaduak daytoy a gayyem iti nadumaduma a pakakumikoman ngem no PM, iti FB, kasla ita man laengen. Email wenno SMS ti gagangay a linia ti komunikasionmi. Diak ammo no ania ti kayatna a sawen wenno no adda kadi limed a mensahe iti PMna ngem sigudko nga inuksot ti charger manipud iti laptopko a sa laengen a maaramat no nakasulbong ti chargerna. Inwalinko dagiti libro ken tiltilaadda iti kama saak nagidda. Nagmayat. Naglittuok pay ti bukotko a nailapat a nalaing iti kama ta saanakon a nagpungan. Kasta pay, gapu ta inwalinko dagiti paspasali a libro ken tiltilaadda, naiyunnatko a nalaing ti lupluppok ken saksakak. Sinurotko ti naiPM kaniak—immangesak.

Lima a nauuneg nga anges. Tay kasla laeng naep-ep a nalaing ti barukongko sako in-inut nga inibbatan. Uray laeng a timmalna ti tagerger ti laslasagko gapu iti diak ninamnama a panagngato ti presion itay pangaldaw. Nariknak ti panaglukay dagiti ramay ken dakulapko a nadlawko a kanayon a kasla nakagemgem uray saanko met nga igemgemgem. Nakaturogak.

Ammok a saan a pimmaot iti maysa nga oras ti turogko. Amangan no saan pay a mabalin nga awagan iti turog ti napasamak. Amangan no ridep laeng. No pay kasta, isun san ti kaiimasan a ridepko kadagitoy nga al-aldaw.

Kayatko koma ti agtenkiu iti nagPM kaniak ngem adtoyak nga isur-surat ti kapadasak ta mabasananto latta no mabasana. Ammona lattan.

(Pagmenmennamennaak ita daytoy balikas nga anges. Posible a saan a siak ti immuna kadaytoy nga espasio ti panagis-isip ngem nakamaymayat laeng ta napadasak a mismo. Kas koma daydiay PM kaniak nga: ‘umangeska.’ Awan met ti naibaga a nasken a nauneg ti panag-anges ngem isu ti inaramidko. Ket ti nagbanaganna, nakariknaak iti gin-awa.

kayatna kadi a sawen nga adda bukod a kapasidad ti tunggal tao a mangipaay iti panaglaing, gin-awa iti bukodna a bagi babaen iti bukodna a panganges?

Ngem apay adda kastoy a maibagbaga: “pagangesennak man met!” Narigat nga ibaga daytoy. Kangrunaanna no kaskay’ kaniak a sigesige iti amin angingana a “saanakon a makaanges” ket ngarud ti panangibaga met iti: “pagangesendak met!” 

Ania ti kayatna a sawen daytoy? Mabalin kadi a maipaidam iti maysa a tao ti abilidad nga umanges? Kayatna a sawen: sabali a tao ti “mangtenggel iti panaganges” ti maysa a tao. Ngem ania la ket a tao ti mangpalubos ken mangbaybay-a iti bukodna a bagi a “di-makaanges,” maysa nga abilidad a gagangay ken nawaya nga aramiden ti maysa a tao? No dika makaangesen, bumaringkuaska, a, ta lumukay ti tenggel ket magun-odmo ti gin-awa.

Ngem manen: mabaringkuasam kadi amin a fuersa?

Ania la ket ta uray gayam ti agdama a pandemia, sakit iti panaganges (pisikal ken epistemolohikal)